ងាកទៅទស្សនាភាពយន្តកាលពីឆ្នាំ ២០០០ ដែលភាគច្រើនសុទ្ធតែរឿងខ្មោច ភ័យរន្ធត់ ផលិតករសម័យនោះហ៊ាន​ទៅថតនៅទីតាំងដែលកើតមានរឿងរ៉ាវពិតៗ ដើម្បីទទួលបានទិដ្ឋភាពរន្ធត់ និងធ្វើឱ្យកុននោះល្បី តែផលិតករមិនអាចភ្លេចទេរឿងសែនព្រេន បន់ស្រន់មុនទៅថតរឿង។

តាមរយៈលោក ឧកញ៉ា ហេង តុលា ដែលជាផលិតកររឿងខ្មោចដ៏ល្បី ដូចជារឿង «ផ្ទះខ្មោចទិញ» រឿង «នាងនាថ» រឿង «ព្រាយកន្ទោងខៀវ» បានប្រាប់ឱ្យដឹងថា មុននឹងចាប់ផ្តើមថត ក្រុមការងាររបស់លោកត្រូវតែរៀបចំពិធីសែនព្រេន ហើយសូម្បីតែក្នុងកុនក៏បង្ហាញពីការសែនព្រេនទៅតាមជំនឿ និងតថភាពនៃសាច់រឿងផងដែរ ដើម្បីធ្វើឱ្យដំណើរការនៃការថតភាពយន្តមានភាពរលូន និងសុវត្ថិភាព។

ជាក់ស្តែង រឿង «ផ្ទះខ្មោចទិញ» ផលិតករពិតជាបានទៅថតផ្ទាល់ក្នុងផ្ទះនោះ និងរៀបចំសាច់រឿងដ៏គួរព្រឺព្រួចនៅទីតាំងល្បីពីការលងបន្លាចស្តែងៗ តែមិនមានជួបហេតុការណ៍ណាគួរឱ្យស្ញើប ឬព្រឺបះរោមឡើយ ផ្ទូយទៅវិញគឺថតរឿងបានយ៉ាងសុខសាន្ត និងទទួលបានភាពជោគជ័យទៀតផង ដោយសារការរៀបសែនព្រេនតាមទម្លាប់ នេះបើតាមការបញ្ជាក់របស់ផលិតកររឿង លោក ឧកញ៉ា ហេង តុលា។

ខាងក្រោមនេះជាវីដេអូដកស្រង់ចេញពីឈុតមួយក្នុងរឿង «ព្រាយកន្ទោងខៀវ» ដែលបង្ហាញពីការអន្ទងនាងខៀវមកចូលរូប ចង់ដឹងថាមានទិដ្ឋភាពយ៉ាងណា? តោះ! ទស្សនាទាំងអស់គ្នា៖