- 2018-02-23 04:39:57
- ភាពយន្ត
ភាពនៅទ្រឹងភាពយន្តបរទេសថតនៅកម្ពុជា ធ្វើឲ្យកម្ពុជាខាតបង់ច្រើន
- 2018-02-23 04:39:57
- ចំនួនមតិ 0 | ចំនួនចែករំលែក 0
ភាពនៅទ្រឹងភាពយន្តបរទេសថតនៅកម្ពុជា ធ្វើឲ្យកម្ពុជាខាតបង់ច្រើន
ចន្លោះមិនឃើញ
កម្ពុជា បានខកខានក្នុងការធ្វើឲ្យកំណើនភាពយន្តបរទេសថតនៅប្រទេសរបស់ខ្លួនកើនឡើង គិតត្រឹមរង្វង់៣ឆ្នាំចុងក្រោយ ដោយទទួលបានត្រឹមប្រហាក់ប្រហែល ៥០គម្រោង ជាចំនួនថេរ។ អ្នកតាមស្ថានការណ៍ មើលឃើញថា កម្ពុជាមានការខាតបង់ច្រើនលើចំណុចនេះ។
ក្នុងរយៈពេលខាងលើ កម្ពុជាទទួលបានគម្រោងភាពយន្តបរទេសមកថតនៅកម្ពុជាតែមួយរឿងប៉ុណ្ណោះ នោះគឺគម្រោងរបស់ផលិតករ Agelina jolie ផលិតរឿង "មុនដំបូងខ្មែរក្រហមសម្លាប់ប៉ាខ្ញុំ" កាលពីពាក់កណ្ដាលឆ្នាំ ២០១៧។ ក្រៅពីនេះគម្រោងរបស់ផលិតករបរទេស ពិសេសអឺរ៉ុប និងអឺរ៉ុប ច្រើនជាភាពយន្តឯកសារ និងកម្មវិធីប៉ុណ្ណោះ ដូចជាកម្មវិធី us survivor ដ៏ល្បីអាមេរិកថតនៅកោះរុងកាលពីឆ្នាំ ២០១៦។
ខ្វះការវិនិយោគរបស់ផលិតករភាពយន្តបរទេសនៅកម្ពុជា ពិសេសប្រភេទ Feature Film ត្រូវបានគេមើលឃើញថា កម្ពុជាខាតបង់ច្រើន។ លោក យឹម សុសត្យា ប្រធានចាត់ចែងផលិតភាពយន្តនៃផលិតកម្ម Rock និងជាផលិតករមួយរូបដែរ បានលើកឡើងថា ការខាតបង់នោះ មានដូចជា ទី១បាត់បង់ឱកាសការងារសម្រាប់កម្មករកុនក្នុងស្រុក។
ទី២បាត់ឱកាសក្នុង Promote ពីខ្លួនឯងទៅកាន់អន្តរជាតិ និងទី៣ ខកខានបង្ហាញពីស្ថិរភាពសង្គមទៅពិភពលោកជាដើម ដែលចំណុចចុងក្រោយនេះ គឺសំខាន់ ដែលធានាថា ផលិតករបរទេសហ៊ាន ឬមិនហ៊ានមកថតកុននៅស្រុកយើងដែរ។
លោក ឆាយ បូរ៉ា ប្រធានសមាគមភាពយន្តអាណត្តិទី៣ ទើបជាប់ឆ្នោតថ្មី ប្រាប់ដែរថា ការខាតបង់មួយទៀត គឺឱកាសរៀនសូត្ររបស់កម្មករ ឬផលិតករកុនក្នុងស្រុកពីការធ្វើការងារជាមួយផលិតករបរទេស។ លោក បន្តថា កន្លងមក បើទោះជាមាន ដូចករណីអ្នកស្រី Angelina jolie មកថតរឿង "មុនដំបូងខ្មែរក្រហមសម្លាប់ប៉ាខ្ញុំ" ក៏ឱកាសការងារ មិនបានធ្លាក់មកដល់ផលិតករពួកលោកដែរ តែជាក្រុមផ្សេង។
ករណីនេះ លោកថា ជាចំណុចសំខាន់មួយ ដែលធានាថា ឧស្សាហកម្មភាពយន្តក្នុងស្រុក អាចមានលទ្ធភាពលូតលឿនទៅមុខបាន ឬមិនបាន។ ជុំវិញបញ្ហានេះ លោក ប៉ុក បូរក្ស បានទទួលស្គាល់ថា កម្ពុជាពិតខាតបង់ ករណីកង្វះការវិនិយោគប្រភេទ Feature Film របស់កម្ពុជាដូចដែលបានលើកឡើងមែន។ និយាយជារួម គឺបង់ឱកាសផ្សព្វផ្សាយចំណុចវិជ្ជមាននានា ពីខ្លួនឯងទៅពិភពលោក។
យ៉ាងនេះក្ដី លោកមានសុទិដ្ឋិនិយមថា អ្វីៗនឹងបានប្រសើរនាពេលខាងមុខ សំអាងថា កម្ពុជាមានសក្ដានុពលជាច្រើន ដូចជាសក្ដានុពលវប្បធម៌ ទីតាំង និងធម្មជាតិជាដើម។ "ក្រៅពីនេះ យើងមានធនធានក្មេងៗមានសក្ដានុពល ទើបដុះមកច្រើន ពួកគេមានភាសាអង់គ្លេសល្អអាចទំនាក់ទំនងជាមួយផលិតករបរទេសបាន។ នេះជាចំណុចល្អ ព្រោះថា វានៅជាចំណុចអវិជ្ជមានរបស់ប្រទេសជិតខាងយើងមួយចំនួននៅឡើយ។ ចំណុចល្អមួយទៀត គឺថ្លៃពលកម្មយើងថោក ទាំងនេះអ្វីដែលផលិតករបរទេសចូលចិត្តយើង"។
ក្រៅពីសក្ដានុពលដែលមានស្រាប់ លោក បូរក្ស បានលើកឡើងទៀតថា កម្ពុជាក៏បានដាក់ចេញរួចហើយ នូវគោលនយោបាយច្បាស់លាស់ ធ្វើយ៉ាងណាប្រែក្លាយកម្ពុជាជាទីតាំងសម្រាប់ថតភាពយន្ត សម្រាប់ផលិតករក្នុងស្រុក និងផលិតករបរទេស ដែលមានចែងក្នុង "គោលនយោបាយជាតិស្ដីពីវប្បធម៌" របស់រាជរដ្ឋាភិបាលកម្ពុជា។
កិច្ចការនានា ដែលអនុលោមតាមគោលនយោបាយនេះ ប្រធាននាយកដ្ឋានដដែល បញ្ជាក់ថា ក្រសួងបានធ្វើកិច្ចសហការជាមួយមជ្ឈមណ្ឌលបណ្ដុះបណ្ដាល និងទទួលថតភាពយន្តពីបរទេសទៀត ធ្វើកិច្ចការនានា ផ្សព្វផ្សាយពីសក្ដានុពលកម្ពុជាទៅអន្តរជាតិ រួមទាំងបណ្ដុះបណ្ដាលធនធានក្នុងស្រុក ដើម្បីអាចធ្វើការជាមួយផលិតករបរទេសបានទៀត។
ក្រៅពីនេះ ការបន្ធូរបន្ថយពន្ធនាំចូលសម្ភារៈបម្រើឲ្យការថតខ្សែភាពយន្ត និងជំរុញពន្លឿនដំណើរការឯកសារនានាជូនផលិតករក្រៅស្រុកជាដើម សុទ្ធជាយុទ្ធសាស្ត្ររបស់រាជរដ្ឋាភិបាលកម្ពុជា ទាក់ទាញក្រុមផលិតពីបរទេស។
កម្ពុជាបានចាប់ផ្ដើមនៅឆ្នាំ ២០០៩ ជាមួយតួលេខស្ទើរគ្មាន សម្រាប់ផលិតករ ឬក្រុមហ៊ុនមកថតនៅក្នុងស្រុក។ ប៉ុន្តែតួលេខ ចាប់ផ្ដើមប្រែប្រួល គឺលោតឡើងខ្លាំងគិតត្រឹមឆ្នាំ ២០១៤ ដោយទទួលបានគម្រោងសុំថតនៅកម្ពុជាប្រមាណ ៣០គម្រោង និងឡើងដល់ប្រមាណ ៥០គម្រោង នៅឆ្នាំ ២០១៥-២០១៦។
មកដល់ឆ្នាំ ២០១៧ កម្ពុជា ក៏មិនបានទទួលចំនួនកើនឡើងពីតួលេខខាងលើ លើគម្រោងថតភាពយន្តបរទេសនៅក្នុងស្រុកដែរ។ ទន្ទឹមនឹងមិនមានកំណើន ផលិតករបរទេសខ្លះ ចូលហើយ ដកលែងថតនៅកម្ពុជាទៀតក៏មាន។ បញ្ហានេះ សាធារណមតិ បានបន្ទោសទៅលើប្រព័ន្ធការងារសម្របសម្រួលខ្លះរបស់ស្ថាប័នពាក់ព័ន្ធនៅមានភាពអសកម្ម ឬក៏អវិជ្ជមានច្រើន។
ជាក់ស្ដែងការដកខ្លួនចុងក្រោយបំផុតនៃរឿង "បេសកកម្មទន្លេមេគង្គ" របស់ផលិតករចិនកាលពីឆ្នាំ ២០១៥ បានធ្វើឲ្យមានការរិះគន់ជាច្រើនលើបញ្ហាអវិជ្ជមានផ្សេងៗលើការងារសម្របសម្រួលនេះ។
និយាយក្នុងលក្ខខណ្ឌមិនបញ្ចេញឈ្មោះ តារាប្រុសម្នាក់ដែលធ្លាប់ត្រូវបានជ្រើសរើសចូលសម្ដែងក្នុងខ្សែភាពយន្ត "បេសកកម្មទន្លេមេគង្គ" មុនពេលក្រុមផលិតនេះ ដកខ្លួនទៅវិញ បានខ្សឹបប្រាប់ថា អាចមានពាក់ព័ន្ធនឹងរឿងលុយក្រោមតុ។ "គេចូលមក ខ្ញុំជឿថា មិនមែននៅសុខៗ នឹកឃើញមកទេ គឺប្រាកដជាចាប់អារម្មណ៍អ្វីពីយើង ចង់និយាយថា គេចង់ថតនៅយើងហើយ ព្រោះបានរើសតួខ្លះហើយតើបង ដល់ស្រាប់តែដកទៅវិញភ្លាមៗចឹង នេះតាមខ្ញុំគិតទេ គឺគ្មានអីក្រៅរឿងលុយហ្នឹងទេ”។
ស្រដៀងនេះដែរ លោក យឹម សុសត្យា ថ្លែងថា "ហ្នឹងហើយ...លឺតែគេថាអីចឹងដែរ វាអាចពាក់ព័ន្ធនឹងការស៊ីកុំមីស្យុងអីចឹងណា លុយក្រោមតុអីហ្នឹងខ្លះទៅ អានេះ គ្រាន់តែលឺល្ហៀងៗទេ តែជាក់ស្ដែង មិនដឹងជាយ៉ាងម៉េចដែរ!”។
មិនអធិប្បាយ អំពីករណីអសកម្មនានានោះ លោក ប៉ុក បូរក្ស ប្រធាននាយកដ្ឋានភាពយន្ត បានទទួលស្គាល់ថា កម្ពុជាពិតជានៅទ្រឹងសម្រាប់ការសុំថតភាពយន្តបរទេសនៅកម្ពុជាមែន ប៉ុន្តែថា និន្នាការនេះ បានកើតមាននៅប្រទេសនានាដូចគ្នា។ លោកអះអាងថា បញ្ហានេះ មួយផ្នែក កើតឡើងមកពីការដណ្ដើមទីផ្សាររៀងៗនៃប្រទេសក្នុងតំបន់ប៉ុណ្ណោះ។
“មិនដឹងថាមកបញ្ហារកប្រាក់របស់ពួកគេ ឬយ៉ាងម៉េច ប៉ុន្តែវាអាចថាអីចេះ គឺអាចមកពីប្រទេសនានា គេមានគោលនយោបាយទាក់ទាញផលិតករបរទេសរៀងខ្លួន ដូចថៃអីគេមានគោលនយោបាយលើកទឹកចិត្ត ដោយឲ្យប្រាក់ ២០%ត្រឡប់វិញ ដែលយន្តការនេះ គឺទាក់ទាញផលិតករមែនទែន ខ្មែរយើងអត់ទាន់មានទេ។ ប៉ុន្តែតាមខ្ញុំបានជួបផលិតករបរទេសខ្លះ គេថា គ្រាន់ជាការប្រូម៉ូតលើក្រដាសទេ ប៉ុន្តែជាក់ស្ដែង ក៏ការបំពេញឯកសារដើម្បីទទួលបានប្រាក់នោះវិញក្រោយពេលចាយ គឺមានភាពរញ៉េរញ៉ៃស្មុគស្មាញមែនទែន ដែលធ្វើឲ្យផលិតករមិនទាន់សប្បាយចិត្តដូចគ្នា"។
បន្ទាប់ពីភាពយន្តហុងកុងខាងលើចូលហើយដកថយវិញ តាមរបាយការណ៍ពីនាយកដ្ឋានភាពយន្ត ឆ្នាំ ២០១៧នេះ កម្ពុជាទទួលកំណើនវិនិយោគរបស់ផលិតករចិនទៅវិញ យ៉ាងកម្រ ចំនួន៣គម្រោងធំៗ ក្នុងនោះ ២បានថតចប់នៅកម្ពុជា។ លោក បូរក្ស លើកឡើងថា នេះជាផលចំណេញមួយរបស់កម្ពុជា ខណៈចិន ជាទីផ្សារធំមួយ ជាមួយចំនួនប្រជាជនច្រើនជាងគេលើពិភពលោក៕
