- 2018-06-26 03:16:04
- ព័ត៌មាន
ស្ងាត់ៗ លេចដំណឹង ចាន់ ស្រីរ័ត្ន ក្លាយជាមន្ត្រីរាជការរបស់ក្រសួងមួយបាត់ហើយ?
- 2018-06-26 03:16:04
- ចំនួនមតិ 0 | ចំនួនចែករំលែក 0
ស្ងាត់ៗ លេចដំណឹង ចាន់ ស្រីរ័ត្ន ក្លាយជាមន្ត្រីរាជការរបស់ក្រសួងមួយបាត់ហើយ?
ចន្លោះមិនឃើញ
តារាសម្ដែង ចាន់ ស្រីរ័ត្ន ដែលធ្វើឲ្យប្រិយមិត្តចាប់អារម្មណ៍ក្នុងស៊េរីរឿង "ឡូយ៩" និងរឿងជាច្រើនទៀតនោះ ពេលនេះមានដំណឹងថា នាងបានក្លាយជាមន្ត្រីរាជការពេញសិទ្ធិនៅក្រសួងមួយបាត់ទៅហើយ។
តាមប្រភពពីក្នុងក្រសួងព័ត៌មាន បានបញ្ចេញឲ្យដឹងថា មួយរយៈចុងក្រោយនេះ គេឧស្សាហ៍ឃើញ តារាស្រីខាងលើចេញចូលបង្ហាញខ្លួននៅស្ថានីយវិទ្យុជាតិ ចំណុះឲ្យក្រសួងព័ត៌មាន។ តាមការសន្និដ្ឋាន ប្រភពថា តារាស្រីរូបនេះ អាចថាជាអ្នកធ្វើការនៅទីនោះតែម្ដង ព្រោះការចេញចូលរបស់ ស្រីរ័ត្ន មានសភាពញឹកញាប់ ជាងភ្ញៀវដែលត្រឹមមានការ ម្ដងម្កាលនោះឡើយ។
"ឯងបានឃើញនាង ចេញចូលវិទ្យុជាតិនេះយូរដែរហើយ អាចថា ចូលឆ្នាំហើយ ហើយថាមិនត្រូវតាមឯងគិត នាងអាច ជាអ្នកធ្វើការនៅទីនោះតែម្ដង ព្រោះមិនអីចឹង មិនមែននាងចេញចូលញឹកញាប់បែបនេះទេ!”។
ការបង្ហើបពីប្រភពលាក់មុខខាងលើ គឺស៊ីគ្នានឹងស្ថានភាពការងារសិល្បៈរបស់នាងសព្វថ្ងៃ ដែលគេមើលឃើញនាង ដូចជារយាល។ ជុំវិញការទម្លាយចេញខាងលើនេះ នៅក្នុងការសន្ទនាខ្លីមួយជាមួយ Sabay ស្រីរ័ត្ន បានទទួលថា នាងពិតជាបានចេញចូលស្ថានីយវិទ្យុជាតិមែន ដោយសារតែមាននាទីជាពិធីការិនីវិទ្យុនៅទីនោះ បន្ថែមពីការងារសិល្បៈរបស់នាង។
តួស្រីក្នុងរឿង "វិបល្លាស" បញ្ជាក់ថា មូលហេតុ ដោយសារនាងគឺជាមន្ត្រីរាជការពេញសិទ្ធិរបស់វិទ្យុជាតិចំណុះឲ្យក្រសួងព័ត៌មាន ដែលបានប្រឡងជាប់ក្នុងការប្រឡងប្រជែងសមត្ថភាពធ្វើឡើងដោយសាមីស្ថានីយ ក៏ដូចជាសាមីក្រសួង។ "ប្រឡងបង គឺខ្ញុំប្រឡងជាប់ ហើយខ្ញុំបានធ្វើការងារ ប្រមាណជា ២ឆ្នាំមកហើយ"។ ស្រីរ័ត្ន ថ្លែង។
យ៉ាងណាក៏ដោយ តារាស្រីនិយមស្រគត់ស្រគំរូបនេះ បដិសេធចំពោះការលើកឡើងពីស្ថានភាពកាងារសិល្បៈរបស់នាង ដែលហាក់មានសភាពធាក់ថយ។ ស្រីរ័ត្ន អះអាងថា មកទល់សព្វថ្ងៃ នាងនៅតែរវល់នឹងការងារសិល្បៈ មានទាំងការសម្ដែង និងការធ្វើជាពិធីការិនីតាមការប្រគំតន្ត្រីនានា។
កញ្ញា ចាន់ ស្រីរ័ត្ន គឺជាតារាស្រីល្បីឈ្មោះមួយរូប ក្នុងនោះចំណុចលេចធ្លោចុងក្រោយរបស់នាង តាមរយៈរឿងរបស់កម្មវិធី "ឡូយ៩" និងរឿង "វិបល្លាស"។ ស្រីរ័ត្ន ប្រាប់ថា បច្ចុប្បន្នមានផលិតកម្មមួយចំនួនទៀត កំពុងទាក់ទងគ្នា ប៉ុន្តែអ្វីៗមិនទាន់បានឯកភាពគ្នានៅឡើយ៕
