- 2018-08-01 04:41:08
- ព័ត៌មាន
ព្រោះតែកូនជិតកើត គីសាន់ រ៉ៃយ៉ា សុខចិត្តឆ្លៀតពីនាទីជាប្រធានក្រុមពិធីការ មករត់កង់បីបន្ថែមទៀត
- 2018-08-01 04:41:08
- ចំនួនមតិ 0 | ចំនួនចែករំលែក 0
ព្រោះតែកូនជិតកើត គីសាន់ រ៉ៃយ៉ា សុខចិត្តឆ្លៀតពីនាទីជាប្រធានក្រុមពិធីការ មករត់កង់បីបន្ថែមទៀត
ចន្លោះមិនឃើញ
បន្ទាប់ពីវិវត្តខ្លួនពីអ្នករត់កង់បី មកជាប្រធានក្រុមពិធីការមួយ ដែលទើបបើកបង្ហាញថ្មីៗ ឥឡូវមានដំណឹងថា កូនប្រុសតារាសម្ដែង ពៅ គីសាន់ លោក គីសាន់ រ៉ៃយ៉ា គ្រោងឆ្លៀតពីអាជីពនេះ ចេញរត់ម៉ូតូកង់បីជាថ្មី។
"គីសាន់ ពីមុននឹងត្រឡប់មកវិញក្នុងពេលឆាប់ៗនេះ" លោក គីសាន់ រ៉ៃយ៉ា បានបង្ហោះលើហ្វេសប៊ុករបស់លោក។ ជាមួយគ្នា គេក៏បានឃើញលោកបង្ហោះរូបលោកបានចូលទៅកន្លែងលក់ម៉ូតូកង់បីឥណ្ឌា ហើយបានភ្ជាប់ជាមួយសារទៀតថា "បើខ្ញុំរត់កង់បី បងប្អូនជួយជិះខ្ញុំអត់?”។ មិត្តភ័ក្ដិលោកជាច្រើន បានបង្ហាញពីការលើកទឹកចិត្តរបស់ពួកគេចំពោះកូនប្រុសតារាសម្ដែង។
ជុំវិញបញ្ហានេះ គីសាន់ រ៉ៃយ៉ា បានឆ្លើយប្រាប់ Sabay ថា ជាការពិត លោកគ្រោងនឹងចេញរត់កង់បី អាជីពចាស់របស់លោកកាលពីជិត១០ឆ្នាំមុនមែន ព្រោះថា លោកមើលខ្លួនឯងនៅសល់ទំនេរច្រើនពេក ដែលគួរតែប្រើពេលវេលានេះរកប្រយោជន៍ ក៏ដូចជាកម្រៃបន្ថែម។ ចំណុចសំខាន់ជាងនេះទៀត ក៏ព្រោះតែលោកជិតទទួលសមាជិកគ្រួសារថ្មីហើយ ជាហេតុធ្វើឲ្យបន្ទុកគ្រួសារកាន់តែធំ។
"បាទបង រត់បងរត់ គឺត្រូវតែរត់(រត់កង់បី) ព្រោះរាល់ថ្ងៃដូចសល់ពេលទំនេរច្រើនពេក ហើយម្យ៉ាងគ្រួសារខ្ញុំ គាត់ជិតសម្រាលហើយ អីចឹងហើយនៅពេលកូនកើតមក ប្រាកដជាចំណាយកាន់តែច្រើន អីចឹងហើយបើមិនឆ្លៀតរកចំណូលបន្ថែមទេ ប្រាកដជាពិបាកហើយ!”។ រ៉ៃយ៉ា ថ្លែង។
បើទោះជាយ៉ាងនេះក្ដី រ៉ៃយ៉ា មិនទាន់បានចេញរត់កង់បីរកចំណូលបន្ថែមនៅឡើយទេ ដោយកំពុងរៀបចំឯកសារ សម្រាប់ការទិញបង់រំលស់ ព្រោះតម្លៃកង់បីឥណ្ឌាដល់ទៅជិត ៤០០០ដុល្លារនោះ លោកមិនមានលទ្ធភាពទិញទេ។ លោកសង្ឃឹមថា ឯកសារនឹងបានស្រេចបាច់ ហើយលោកនឹងបានម៉ូតូកង់បី មកប្រកបអាជីពក្នុងពេលឆាប់ៗ។
គីសាន់ រ៉ៃយ៉ា បានតស៊ូច្រើនឆ្នាំ រត់កង់បីផង និងលក់បាយម្ហូបផង បើទោះលោកត្រូវបានគេស្គាល់ថាជាតារាសម្ដែងម្នាក់ក៏ដោយ។ ក្រោយពីតស៊ូបានប៉ុន្មានឆ្នាំ កូនប្រុសលោក ពៅ គីសាន់ ក៏បានក្លាយជាប្រធាននៃក្រុមពិធីការ "គីសាន់ រ៉ៃយ៉ា តន្ត្រី" ដែលមានទទួលរៀបចំផ្នែកពិធីការ មានដូចជា មង្គលការ ខួបកំណើត និងពិធីជប់លៀងផ្សេងៗ។ អាជីពថ្មីបានជួយឲ្យជីវភាពរបស់លោក បានប្រសើរមួយកម្រិត។
ប៉ុន្តែមិនទាន់ផុតការភ័យនៅឡើយ ពិសេសពេលរដូវភ្លៀងចូលមកដល់ ការងារផ្នែកពិធីការរបស់លោកធ្លាក់ចុះយ៉ាងខ្លាំង ធ្វើឲ្យលោកមានពេលទំនេរច្រើន។ ផ្សំនឹងត្រូវរ៉ាប់រងបន្ទុកចំពោះកំណើតកូនដំបូងឆាប់ៗនេះផង រ៉ៃយ៉ា ប្រាប់ថា លោកលែងមានភាពស្ទាក់ស្ទើរ សម្រាប់វិលទៅកាន់អាជីពជាអ្នករត់កង់បន្ថែមពីតួនាទីជាប្រធានក្រុមពិធីការឡើយ។
ព័ត៌មានចុងក្រោយ គីសាន់ រ៉ៃយ៉ា ទទួលបានកង់បីពីការបង់រំលស់ហើយ។ "បានហើយបង អីចឹងទំនេរពីការងារ ខ្ញុំនឹងរត់ហើយ!”។
លោក រ៉ៃយ៉ា បានរៀបអាពាហ៍ពិពាហ៍ កាលពីខែ ១១ ឆ្នាំ ២០១៧។ បច្ចុប្បន្ន ភរិយារបស់លោកកំពុងពពោះកូនដំបូង គ្រោងនឹងសម្រាលនៅក្នុងរង្វង់ខែក្រោយនេះ៕
