តួឯកស្រីទំាង៤ផ្តុំគ្នា កក្រើករឿង "ថ្ងៃមុនស្អប់ ថ្ងៃនេះស្រលាញ់"

2018-08-10 06:33:10
ភាពយន្ត

2018-08-10 06:33:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តភាគបំឡែងចេញពីប្រលោមលោកដំបូងគេដែលទូរទស្សន៍ក្នុងស្រុកបានឲ្យតម្លៃកម្មសិទ្ធិបញ្ញាខ្ពស់បំផុតក្នុងប្រវត្តិនៃការផលិតភាពយន្ត "ថ្ងៃមុនស្អប់ ថ្ងៃនេះស្រលាញ់" កំពុងដំណើរការថតយ៉ាងរលូនបាន៧០ ទៅ៨០%ហើយ។ មុននឹងបានទស្សនាភាពយន្ត ភាគដ៏ល្អមួយនេះ Sabay នឹងណែនាំតួឯកស្រីចំនួន៤រូប ដ៏ស្រស់សោភា និងមានទេពកោសល្យ ដែលបានចូលរួមសម្តែងក្នុងរឿងភាគមានរសនិយមថ្មីមួយនេះ ធ្វើឲ្យសាច់រឿងកាន់តែកក្រើក។

១.រាសី សម្តែងជា បុស្បានារី៖ សម្តែងជាតួអង្គដែលមានគំនាបពីគ្រួសារ តែមានចិត្តស្មោះចំពោះស្នេហា។ ១រឿងនេះស្រីស្អាត រាសី អះអាងថា ស្រលាញ់ខ្លាំងបំផុត ថែមទាំងសម្តែងអស់ពីក្នុងខ្លូន។ "ខ្ញុំមិនដែលរន្ធត់ស្មើនឹងលេងរឿងមួយនេះទេ !ខ្ញុំដើរតួជាតារាល្បី ដែលមានសង្សារជាអ្នកមាន ហើយត្រូវម្តាយគេតាមបំបែកមើលងាយមើលថោក! វាជារឿងដែលល្អ ល្អមែនទែនត្រូវនឹងសង្គមពិត ដែលមនុស្សនិយមមើលងាយគ្នាទៅវិញទៅមក ទំាងដឹងហើយថា ចុងក្រោយគង់តែមានទីបញ្ចប់ដូចគ្នា"។

២.ស្រីឡាង សម្តែងជា ប៉ែន ពេជ្រសក្កណា៖ តួអង្គស្រីដែលសម្តែងជាមួយដៃគូកម្សត់កម្រប្រុសសង្ហា ប៊ឺរី រូបនេះបានឲ្យមេដៃចំពោះរឿងភាគខ្មែរមួយនេះ ព្រោះតែគ្រប់ពាក្យពេចន៍សន្ទនាល្អលើសពីស្មាន។ "និយាយពីយំ យំឡើងរីងខ្លួន គឺថតវេទនាជាងតួផ្សេងៗ ! គឺជារឿងខ្មែរដែលតួសម្តែងពេញចិត្ត និយាយពីបង ជាឡាយ វិញ សម្តែងហើយញញឹមបិទមាត់មិនជិត គឺគ្រប់គ្នាស្រាលាញ់ការងារនេះ" ស្រីឡាង រៀបរាប់ទាំងរំភើប។

៣.ស៊ាវម៉ី សម្តែងតួ ប៉ែនពេជ្រអមរា៖ មិនខុសពីតារាស្រីខាងលើប៉ុន្មានទេ ស៊ាវម៉ី ទទួលស្គាល់ថា រឿង "ថ្ងៃមុនស្អប់ ថ្ងៃនេះស្រលាញ់" មានការអប់រំចិត្តខ្ពស់ កញ្ញាសប្បាយចិត្ត ទទួលបានបទពិសោធន៍ច្រើន ខំប្រឹងសម្តែងអស់ពីលទ្ធភាពដែលមាន ដើម្បីឲ្យស័ក្តិសមជារឿងល្បី។ "គិតមើលទៅយើងជាកូនស្រីគេ សុខៗមកដឹងថាយើងមិនមែនកូនប៉ាយើងតែជាកូនប្រុសផ្សេង តើចិត្តយើងទទួលបានដែរអត់? ជ្រើសរើសគ្រឿងស្រវឹងជាដំណោះស្រាយវាមិនដែលល្អនោះទេ តែខ្ញុំបានឆ្លងកាត់វាដោយការសម្តែង"។

៤.ស្រីខួច សម្តែងជា តួអង្គមេធាវី ពៅ បញ្ញា៖ ពិបាកបន្តិចសម្រាប់អត្តចរិតពិតរបស់ ស្រីខួច ដែលមកសម្តែងជា តួអង្គមេធាវីស្រគត់ស្រគំ តែចិត្តរឹងដូចដែក មិនចេះស្រក់ទឹកភ្នែក យ៉ាងណាក៏តារាស្រីរូបនេះបានខំប្រឹងជម្នះការលំបាកឲ្យបាន មិនឲ្យអ្នកនិពន្ធអស់សង្ឃឹមនោះទេ។ "ខ្ញុំចាប់ដៃគូជាមួយបង ជាឡាយ ដំបូង ខ្ញុំភ័យខ្លាចលេងទៅមិនបានល្អដូចដៃគូមុនៗរបស់គាត់ ហើយនេះជាប្រលោមលោកល្បី ខ្ញុំមានសម្ពាធដែរ ព្រោះខ្លាចហ្វេនបង ម៉ីសន សុធារី មិនពេញចិត្តគឺខ្ញុំខំមែនទែន! គ្រប់គ្នាសុទ្ធតែខំ!” ស្រីពីន អះអាង។