មិនធម្មតា! ផាន់ ផាត់ណា សម្ដែងក្នុងរឿងថ្មីជាមួយតារាល្បីចិនផលិតករចាយទុន ២លានដុល្លារ

2018-09-03 02:13:38
ភាពយន្ត

2018-09-03 02:13:38
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃទី ១ ខែ កញ្ញា ឆ្នាំ ២០១៨ កន្លងទៅនេះផលិតករចិនបានធ្វើពិធីសម្ពោធចេញថតជាផ្លូវការភាពយន្តខ្នាតធំ“ពន្លកស្នេហ៍រីកលើដីកម្ពុជា” នៅសណ្ឋាគារព្រីនស៍ថាម ខេត្តព្រះសីហនុ។ដោយមានតារាខ្មែរកញ្ញា ផាន់ ផាត់ណា និងតួឯកប្រុសមកពីប្រទេសចិនលោក Sunxu Bo ចាប់ដៃគ្នាសម្ដែងជាលើកដំបូង ឯដើមទុនក្នុងការចំណាយវិញ ២លានដុល្លារអាមេរិកឯណោះ។

ផាន់ ផាត់ណា និង Sunxu Bo តារាសម្ដែងចិន

ថ្លែងក្នុងពិធីខាងលើលោក លី មីន អគ្គនាយកក្រុមហ៊ុន Prince Real Estate Group បានមានប្រសាសន៍ថា រឿង “ពន្លកស្នេហ៍រីកលើដីកម្ពុជា” ដែលមានតារាកម្ពុជា ផាន់ ផាត់ណា និង និងតួឯកប្រុសចិន Sunxu Bo ចាប់ដៃគ្នាសម្ដែងជាលើកដំបូងនេះក្រុមហ៊ុនលោក បានចំណាយទុន ២លានដុល្លារអាមេរិកក្នុងផលិត។ដើម្បីផ្ដិតយកទីតាំងចំនួន៤ក្នុងប្រទេសកម្ពុជាមាន ទីក្រុងភ្នំពេញ ខេត្តសៀមរាប ភ្នំបូកគោ និងកោះរ៉ុង។

ចំណែកឯទីតាំងថតក្នុងប្រទេសចិនវិញត្រូវបានជ្រើសរើសខេត្ត Teng chongសង្កាត់ Qiao Xiang ក្រុង Kun Ming ខេត្ត អ៊ីនណាន។ ចំពោះមូលហេតុដែលជំរុញឲ្យលោក ផលិតរឿងខ្នាតធំនេះឡើងនៅកម្ពុជាដើម្បីអបអរសាទរគម្រប់ខួប៦០ឆ្នាំកិច្ចសហការកម្ពុជា-ចិន ក្នុងគោលបំណងផ្លាស់ប្ដូរវប្បធម៌ប្រពៃណីគ្នាទៅវិញទៅមក ពិសេសពង្រឹងចំណងមិត្តភាពរវាងប្រទេសទាំងពីរឲ្យកាន់តែខ្លាំងឡើង។

លោក លី មីន អគ្គនាយកក្រុមហ៊ុន Prince Real Estate Group

លោកថា៖" ខ្ញុំជឿជាក់ថា ពិភពលោក នឹងស្គាល់កម្ពុជាកាន់តែច្បាស់ នៅពេលរឿង“ពន្លកស្នេហ៍រីកលើដីកម្ពុជា” យកទៅបញ្ចាំងនៅប្រទេសចិន និង មហោស្រពនៅអាមេរិកដើម្បីប្រកួតយកពាន ក្នុងឆ្នាំ២០១៩ ខាងមុខ។ បន្ថែមពីនេះខ្ញុំសង្ឃឹមថាភ្ញៀវបរទេសនឹងមកទស្សនាកម្ពុជាកាន់តែកើនឡើងតាមរយៈភាពយន្តមួយនេះ"។

ឆ្លៀតក្នុងឱកាសនេះដែរឯកឧត្ដម ថោង ខុន រដ្ឋមន្ត្រីក្រសួងទេសចរណ៍ ក៏បានបង្ហាញអារម្មណ៍គាំទ្រ និងគំនិតផ្ដួចផ្ដើមក្នុងការផលិតភាពយន្តខ្នាតធំរឿង“ពន្លកស្នេហ៍រីកលើដីកម្ពុជា” នេះឡើង។ឯកឧត្ដម សង្ឃឹមថា ភាពយន្តមួយនេះនឹងរួមចំណែកដល់ការជួយផ្សព្វផ្សាយពីកម្ពុជាទៅកាន់ពិភពលោក និងទីផ្សារចិន។

ឯកឧត្ដម ថោង ខុន រដ្ឋមន្ត្រីក្រសួងទេសចរណ៍

ឯកឧត្ដមបានមានប្រសាសន៍ថា៖" តាមរយៈរឿង“ពន្លកស្នេហ៍រីកលើដីកម្ពុជា” ខ្ញុំជឿជាក់ថាប្រទេសនៅជុំវិញពិភពលោក នឹងស្គាល់វប្បធម៌ប្រពៃណីកម្ពុជាកាន់តែច្បាស់ជាងមុន។ពិសេសជាងនេះគឺពង្រឹងចំណងមិត្តភាពរវាងប្រទេសទាំងពីរឲ្យកាន់តែស្និទ្ធស្នាលទ្វេឡើង"។

ជាមួយគ្នានេះដែរកញ្ញា ផាន់ ផាត់ណា តួឯកស្រីក្នុងរឿង“ពន្លកស្នេហ៍រីកលើដីកម្ពុជា” ថា នាងពិតជាមានអារម្មណ៍រំភើបយ៉ាងខ្លាំង ដោយមិននឹកស្មានខ្លួនមានឱកាសបានថតរឿងខ្នាតធំជាមួយកំពូលតារាសម្ដែងមកពីប្រទេសចិននោះទេ។ ដូច្នេះនាង សន្យាថានឹងខិតខំប្រឹងប្រែងសម្ដែងឲ្យបានល្អនៅក្នុងរឿងមួយនេះមិនឲ្យពុកម៉ែបងប្អូនដែលគាំទ្រខកបំណងឡើយ។

Sunxu Bo តារាសម្ដែងចិន និង ផាន់ ផាត់ណា

“អ្វីដែលខ្ញុំរំភើបខ្លាំងនោះបង គឺរឿងមួយនេះយកទៅបញ្ចាំងនៅប្រទេសចិន និងយកទៅប្រកួតប្រជែងយកពាននៅអាមេរិក ក្នុងឆ្នាំ២០១៩ខាងមុខនេះ។ ខ្ញុំសង្ឃឹមថារឿងដែលខ្ញុំសម្ដែងតួឯកជាមួយលោក Sunxu Bo គឺជាចំណែកមួយផ្សព្វផ្សាយចំណងមិត្តភាពរវាងប្រទេសទាំងពីរ។ មានវប្បធម៌ប្រពៃណីជាដើម"។ ផាន់ ផាត់ណា បន្ថែម។ “ពន្លកស្នេហ៍រីកលើដីកម្ពុជា” ប្រភេទភាពយន្តបែបមនោសញ្ចេតនាស្នេហ៍បែបរ៉ូមែនទិកអូនបងរវាងកំលោះសង្ហាមកពីប្រទេសចិន និងនារីកម្ពុជា។ ដោយដំណើរការចេញថតក្រោយសម្ពោធបាន១ថ្ងៃ គ្រោងនឹងបញ្ចប់ការថតនៅខែធ្នូ ឆ្នាំ ២០១៨ ៕