ថ្មីៗនេះភាពយន្តខ្លីបែបអប់រំមួយ បង្ហោះផ្សព្វផ្សាយលើ Page ផ្លូវការរបស់ ព្រះ​តេជគុណ​ គូ សុភាព ចំណង​ជើង​ថា «ករុណា​ទាន» តាម​ពិត​ជា​ស្នាដៃ​តែង​និពន្ធ និង​ផលិត​ដោយ ​ ឌីជេ តី លក់​ណែម។

ត្បិតជាស្នាដៃផលិត និងសរសេរជាលើកទីមួយមែន រឿងខ្លី «ករុណាទាន» មានអ្នកទស្សនាច្រើន​ជាង​ ១០ ម៉ឺន​អ្នក​ទស្សនា​ហើយ​ក្នុងរយៈពេលប៉ុន្មានថ្ងៃមកនេះ។ ភាពយន្តខ្លី នេះត្រូវបាន ឌីជេ តី រៀបរាប់ថា ជា​រឿងរ៉ាវជីវិតមួយដែលកញ្ញាធ្លាប់មើលឃើញផ្ទាល់ភ្នែក ហើយកញ្ញា ចង់​ផ្សព្វផ្សាយ​ជាការ​ចែក​រំលែក​ជូន​ដល់​អ្នក​ក្រខ្សត់​ដោយ​ចិត្ត​មេត្តា​ មិន​គិត​ថា​នឹង​ចង់​បាន​ការ​តប​ស្នង​សង​គុណ​វិញ​។

ភាពយន្តខ្លីនេះ ក៏មានការចូលរួមផលិតដោយមិត្តភ័ក្ត និង​អ្នក​ស្គាល់​គ្នា​លើ​វិស័យ​ភាពយន្ត​ជំនាន់​ថ្មី​ដែល​មិន​ទាន់​មាន​បទ​ពិសោធន៍​ច្រើន​នោះ​ទេ តែកញ្ញា តី ប្រាប់ ថា​ជា​ការ​ចូលរួម​ដោយ​ស្ម័គ្រ​ចិត្ត​ទាំងអស់​គ្នា ទាំង​តួ​សម្តែង ក្រុម​ការងារ​ផលិត​ទាំង​អស់​​។ ក្នុងនោះកញ្ញា តី ក៏ទទួលបានការលើកទឹកចិត្ពីតព្រះករុណា ព្រះគុណម្ចាស់ គូ សុភាព ដែលតេជគុណផ្តល់ឱកាសឱ្យភាពយន្តខ្លីនេះចេញផ្សាយលើ page របស់តេជគុណ និងបានគាំទ្រសាច់រឿងសរសេរដោយកញ្ញាម្តងនេះ។

កញ្ញា ព្រំ រីតាសុមនា ហៅ DJ តី លក់ណែមរូបនេះ បន្តថា បន្ទាប់ពីបានផលិតភាពយន្តខ្លីនេះរួច ហើយទទួលបានការគាំទ្រគួរសម កញ្ញា ក៏តាំងចិត្តថា នឹងព្យាយាម​និពន្ធរឿង ហើយផលិតរឿងខ្លីថ្មីៗទៀត ដើម្បីជាប្រយោជន៍ដល់សង្គមជាតិតាមតែអាចធ្វើបាន៕

ចង់ដឹងថាភាពយន្តខ្លី «ករុណាទាន» មានអត្ថន័យបែបណា សូមរីករាយទស្សនាវីដេអូរឿងខ្លីនេះខាងក្រោម៖