- 2021-01-29 03:44:11
- ព័ត៌មាន
មានហេតុផលមួយ ដែលអ្នកនិពន្ធ សុខ សុធន នៅបន្ដកាន់ប៊ិក និងសៀវភៅរហូតដល់ចាស់
- 2021-01-29 03:44:11
- ចំនួនមតិ 0 | ចំនួនចែករំលែក 0
មានហេតុផលមួយ ដែលអ្នកនិពន្ធ សុខ សុធន នៅបន្ដកាន់ប៊ិក និងសៀវភៅរហូតដល់ចាស់
ចន្លោះមិនឃើញ
ឆ្លងកាត់អាជីពតែងនិពន្ធ ដឹកនាំរឿង និងសម្ដែងដោយខ្លួនឯងផ្ទាល់អស់រយៈពេលជាច្រើនឆ្នាំ លោក សុខ សុធន ទើបបញ្ចេញពាក្យពេចន៍កប់លាក់ក្នុងចិត្តជាយូរមកហើយនោះទៅកាន់មហាជនតាមបណ្ដាញសង្គមកាលពីថ្ងៃម្សិលមិញ។ លោកពោលថា លោកនៅតែប្រឹងប្រែងការងារតែងនិពន្ធ និងសម្ដែងរហូត ដើម្បីបន្សល់ទុកនូវស្នាដៃខ្លះសម្រាប់ក្មេងៗជំនាន់ក្រោយ។
លោក សុខ សុធន បានសរសេរកំណាព្យខ្លីមួយដែលថ្លែងពីអារម្មណ៍របស់លោកថា៖"ពីក្មេងដល់ចាស់ ប៊ិកនិងក្រដាស ខ្ញុំតែងស្នេហ៍ស្និទ្ធ តាំងពីភ្នែកភ្លឺ ស្ទើរនឹងងងឹត ក៏នៅមានចិត្ត គេងគិតអក្ខរា"។
លោក សុខ សុធន ដែលពេលនេះមានវ័យ៦១ឆ្នាំទៅហើយ បានប្រឡូកក្នុងអាជីពសម្ដែងក្នុងរយៈប្រមាណ៥ឆ្នាំចុងក្រោយនេះ បន្ទាប់ពីលោកដកឃ្លាបន្តិចពីអាជីពតែងនិពន្ធ និងដឹកនាំរឿងតាំងពីអំឡុងឆ្នាំ១៩៨៩។ ប៉ុន្តែលោកធ្លាប់ប្រាប់ Sabay ថា ជីវិតចុងក្រោយរបស់លោកនឹងនៅជាប់ជាមួយនឹងវិស័យតែងនិពន្ធ និងភាពយន្ត ដូច្នេះលោកត្រូវបែងចែកពេលខ្លះសម្រាប់ការសម្ដែងផង និងនិពន្ធផង។
មហាជនស្គាល់ផលិតករភាពយន្តរូបនេះកាន់តែច្រើន ក្រោយពីលោកចេញមុខសម្ដែងដោយខ្លួនឯងដោយផ្ទាល់ក្នុងនាមជាតួអង្គសំខាន់ៗ ក្នុងរឿងអប់រំជាច្រើន។ ក្រៅពីមានជំនាញខាងនិពន្ធ និងដឹកនាំរឿង លោក សុខ សុធន គឺជាតួសម្ដែងដ៏មានទេពកោសល្យ ដោយភាគច្រើនលោកដើរជាតួអង្គចាស់ព្រឹទ្ធាចារ្យ គ្រូបង្រៀន អ្នកច្បាប់ និងជាឪពុក។ ក្រៅពីនិពន្ធ និងដឹកនាំរឿងអប់រំដ៏ច្រើន លោកក៏ជាអ្នកនិពន្ធក្នុងរឿងភាគ និងភាពយន្តខ្នាតធំជាច្រើនដូចជា៖រឿង"ខ្លែងដាច់ខ្សែ" "ស្ដេចដំរីស" និងរឿង"ព្រាយដែកគោល" ជាដើម៕
