បន្ទាប់ពីទទួលបានការគាំទ្រខ្លាំងក្នុងខ្សែភាពយន្ដបែបអប្បិយជំនឿ ភ័យរន្ធត់ និងបង្កប់នូវសំណើចតាំងពីដើមរហូតដល់ចប់ នៃរឿង“ក្រឡអីហ្នឹង”វគ្គ១ និងវគ្គ២ ឥឡូវធ្លាយដំណឹងថា “ក្រឡអីហ្នឹង”វគ្គ៣ របស់ផលិតកម្ម អិល ឌី គ្រោងចាក់បញ្ចាំងនាចុងខែមីនា ឆ្នាំ២០២៣ នេះទៀតហើយ។

តាមរយៈ Teaser មួយបញ្ចេញដោយក្រុមហ៊ុន អិល ឌី នៅលើបណ្ដាញសង្គម គេឃើញមានអ្នកចូលទៅចុចLike និងទស្សនា រាប់ម៉ឺនដង ហើយទទូចចង់ឲ្យក្រុមហ៊ុនបញ្ចេញខ្សែភាពយន្ដនេះឲ្យបានលឿននៅតាមរោងកុន ដើម្បីឲ្យពួកគេទទួលបានចំណីអារម្មណ៍ដ៏អស្ចារ្យមួយទៀត។

បន្ថែមលើអ្វីដែលទំព័រហ្វេសប៊ុកផ្លូវការរបស់ផលិតកម្ម អិល ឌី បញ្ចេញនេះ មានបុគ្គលិកម្នាក់ នៃផលិតកម្មកម្សាន្ដនៅកម្ពុជាឈានមុខគេមួយនេះបញ្ជាក់ថា “ក្រឡអីហ្នឹង”វគ្គ៣ ពិតជាឡើងនៅគ្រប់រោងកុន នៅថ្ងៃទី២៣ ខែមីនា ឆ្នាំ២០២៣ មែន ហើយក្រុមការងារកំពុងពិភាក្សាគ្នា ដើម្បីរកថ្ងៃដាក់សម្ពោធជាផ្លូវការ។

កញ្ញាបន្ថែមថា៖ “យើងពិតជារំភើប នៅពេលដែលចេញ Teaser ទៅទទួលបានការចាប់អារម្មណ៍ច្រើន ហើយវគ្គនេះកាន់តែពិសេស ព្រោះទស្សនិកជន នឹងបានជួបតួល្បីៗកាន់តែច្រើន ហើយជឿថាវគ្គ៣ នេះ ផ្ទុះការគាំទ្រដូចពីរវគ្គមុនដែរ”៕