បាត់មុខជាង១០ឆ្នាំ តួឯកស្រីធ្លាប់សម្ដែងរឿងថ្វាយព្រះបរមរតនកោដបង្ហាញខ្លួនជាថ្មី

2017-08-08 07:27:06
ភាពយន្ត

2017-08-08 07:27:06
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅព្រឹកមិញនេះផលិតកម្ម Rock បានធ្វើពិធីក្រុងពាលីខ្សែភាពយន្តភាគរឿង "វាសនានាងវីរីយ៉ា" នៅបុរីលឹមឈាងហាក់ អូដឹម។ ខ្សែភាពយន្តភាគនេះដែរក៏មានវត្តមានតួឯកស្រីធ្លាប់សម្ដែងរឿងថ្វាយព្រះបរមរតនកោដ អ្នកនាង ឡាយ សានិកា ផងដែរ ក្រោយពីបាត់មុខជាង១០ឆ្នាំនៅលើផ្ទាំងកំណាត់ស និងកញ្ចក់ទូរទស្សន៍។

អ្នកនាង ឡាយ សានិកា បានប្រាប់ Sabay ថា មុនឈប់ពីសិល្បៈនាងធ្លាប់សម្ដែងខ្សែភាពយន្តភាគមិនក្រោម១០រឿង ព្រមទាំងរឿងថ្វាយព្រះបរមរតនកោដ ៣រឿងទៀត ដែលដាក់បញ្ចាំងនៅទូរទស្សន៍ជាតិកម្ពុជានាពេលកន្លងមក។ ការវិលចូលសិល្បៈសារជាថ្មីនេះដោយសារតែរឿង "វាសនានាងវីរីយ៉ា" នេះ ស្វាមីខ្លួនជាអ្នកផលិតឲ្យផលិតកម្ម Rock ហេតុដូច្នេះហើយទើបសម្រេចចិត្តចូលសម្ដែងឡើងវិញ ដោយដើរតួធ្វើជាម្ដាយតួឯកប្រុស។

“មកដល់ពេលនេះបានជាខ្ញុំសម្រេចចិត្តចូលថតរឿងវិញ ព្រោះរឿងនេះគ្រួសារខ្ញុំផលិតឲ្យផលិតកម្មRock ហើយតួអង្គជាម្ដាយហ្នឹងសមទៅតាមវ័យរបស់ខ្ញុំ។ រឿងនេះជារឿងទី១របស់ខ្ញុំបន្ទាប់ពីផ្អាកពីសិល្បៈរយៈពេល១០ឆ្នាំ ។ មូលហេតុដែលខ្ញុំឈប់លើកមុនដោយសារតែមានការកៀបសង្កត់ពីអ្នកមានអំណាចតែខ្ញុំអត់ចង់និយាយរឿងហ្នឹងទេ"។ ឡាយ សានិកា ថ្លែងបញ្ជាក់។

ឡាយ សានិកា បន្ថែមថារឿងធ្លាប់សម្ដែងថ្វាយព្រះបរមរតនកោដ កន្លងមាន៖ រឿង "កោះទន្សាយ" ចំណែកឯពីររឿងទៀតនាងមិនសូវចាំចំណងជើង។ ចំណែកឯរឿងធម្មតាមានរឿង "ចៅចាក់ស្មុគ" "បង្កួយស៊ីមនុស្ស" "ផ្ទះលក់មឈូស" និងជាច្រើនរឿងទៀត។

លោក យូ សុភា

ក្នុងពិធីក្រុងពាលីខ្សែភាពយន្តភាគខាងលើនេះលោក យូ សុភា ជាអ្នកនិពន្ធបានលើកឡើងថា រឿង "វាសនានាងវីរីយ៉ា" មាន៥០ភាគ ជាប្រភេទខ្សែភាពយន្តបែបមនោសញ្ចេតនា ស្នេហាអូនបង ដែលនិយាយអំពីជីវិតក្មេងស្រីម្នាក់ កំព្រាឪពុក មានម្ដាយជាអ្នកបម្រើនៅផ្ទះសេដ្ឋី ក្មេងស្រីនោះតែងតែទទួលបានការមាក់ងាយមើលថោកពីផ្ទះមហាសេដ្ឋី ។

លោក ថោង ស្ដារលីន

ដោយឡែកលោក ថោង ស្ដារលីន ជាប្រធានផ្នែកទីផ្សា និងជំនួយការផលិតបានលើកឡើងថា រឿង "វាសនានាងវីរីយ៉ា" គ្រោងនឹងដំណើរការថតនៅថ្ងៃទី១០ ខែសីហា ឆ្នាំ២០១៧ ខាងមុខនេះ ចំណែកឯទីតាំងថតវិញនៅសណ្ឋាគារមួយនៃទីក្រុងភ្នំពេញ ចំណែកឯដើមទុននៃការផលិតខ្សែភាពយន្តភាគថ្មីនេះលោកសុំមិនបញ្ចេញ។

គួរបញ្ជាក់ថារឿង "វាសនានាងវីរីយ៉ា" នឹងចាក់បញ្ចាំងនៅទូរទស្សន៍CTN បន្ទាប់ពីថតចប់ ចូលរួមសម្ដែងដោយ លោក សេង មង្គល កញ្ញា ស៊ឹម ស៊ីនិច អ្នកនាង ឡាយ សានិកា លោក រចនា ដួង អ្នកនាង សុធារ៉ា កញ្ញា ម៉ា នីកា លោក លៀង ឧត្តម និងតារាសម្ដែងស្រីប្រុសជាច្រើនរូបទៀត៕