- 2017-08-22 23:15:00
- ភាពយន្ត
រកឃើញទីតាំងរោងកុនជាង៣០កន្លែងនៅភ្នំពេញ ជំនាន់សម័យបារាំង និងសង្គមរាស្ត្រនិយម
- 2017-08-22 23:15:00
- ចំនួនមតិ 0 | ចំនួនចែករំលែក 0
រកឃើញទីតាំងរោងកុនជាង៣០កន្លែងនៅភ្នំពេញ ជំនាន់សម័យបារាំង និងសង្គមរាស្ត្រនិយម
ចន្លោះមិនឃើញ
យុវជនមួយក្រុមបានរៀបចំស្រាវជ្រាវទីតាំងរោងកុនកាលនៅសម័យបារាំង រហូតមកដល់មុនឆ្នាំ២០០០ ដើម្បីទុកជាឯកសារស្រាវជ្រាវប្រវត្តិរោងកុនសម្រាប់ក្មេងជំនាន់ក្រោយ។
កញ្ញា ហ៊ុន សុបញ្ញា ប្រធានក្រុមស្រាវជ្រាវ"គម្រោងរោងកុន"បានប្រាប់ Sabay ថា ការស្រាវជ្រាវ ត្រួសៗរោងកុននៅសម័យបារាំង និងសង្គមរាស្រ្តនិយម មានដល់ជាង៣០រោងកុន។ ក្នុងចំណោមរោងកុនទាំងអស់នោះ ក្រុមការងារបានចុះទៅមើលដល់ទីតាំងរោងកុនចំនួន១២ហើយ។
រោងកុនទាំង១២នោះរួមមាន រោងភាពយន្តតារា, អេដែន, ទ្រុងកុក, ខេមរា,ភ្នំពេញ ហេមជាតិ, ម៉ាសេស្ទិច, កាស៊ីណូ, គីមសឹង, កាពីតូល, ព្រហ្មបាយ័ន, និងរោងភាពយន្តលុច្ស ដែលភាគច្រើនសាង សង់នៅជិតមាត់ទន្លេ។
មកដល់បច្ចុប្បន្ននេះរោងកុនទាំង១២នោះ បានប្ដូរទៅជាផ្ទះជួល ហាងអាហារ ឬផ្លាស់ប្ដូរទៅសំណង់អ្វីផ្សេងៗ។ កញ្ញាបញ្ជាក់ថា ការស្រាវជ្រាវនេះដើម្បីស្វែងយល់ពីភាពខុសគ្នារវាងសំណង់ស្ថាបត្យកម្មរោងរោងកុនសម័យមុន និងស្វែងយល់ពីចំណង់ចំណូលចិត្តមនុស្សក្នុងសម័យទាំងនោះថាចូលចិត្តរឿងប្រភេទណា។
“ដោយសារតែរោងកុនមានការប្រែប្រួលប្ដូរមុខងារ និងមានការវ៉ៃចោល អ៊ីចឹងពួកខ្ញុំចង់ស្រាវជ្រាវទុកជាឯកសារសម្រាប់ទៅថ្ងៃអនាគត។ បើសិនជាអត់មានអ្នកណាស្រាវជ្រាវពីវាទេ ទៅមុខទៅប្រាកដជាអត់មានអ្នកណាដឹងពីប្រវត្តិរោងកុននៅស្រុកខ្មែរទេ។ ខ្ញុំបានសម្ភាសន៍អ្នកចូលចិត្តមើលកុន និងអ្នកមានផ្ទះនៅក្បែររោងកុនកាលនៅសម័យនោះមួយចំនួន និងស្រាវជ្រាវពីអ៊ីនធឺណិត”។
គម្រោងស្រាវជ្រាវរោងកុននេះចាប់ផ្ដើមតាំងពីខែ វិច្ឆិកា ឆ្នាំ២០១៦ ហើយនឹងត្រូវបញ្ចប់វិញនៅអំឡុងខែធ្នូ ឆ្នាំ២០១៧នេះ។ មុននឹងបញ្ចប់គម្រោង ក្រុមនេះនឹងមានការដាក់តាំងពិព័រណ៍ពីសមិទ្ធផលដែលខ្លួនបានស្រាវជ្រាវរយៈកាលមួយឆ្នាំមកនេះ។ ក្រុមស្រាវជ្រាវនេះមានសមាជិកចំនួន៨នាក់ ដែលជានិស្សិតស្ថាបត្យកម្ម ដែលបានបញ្ចប់ និងទើបបញ្ចប់ការសិក្សាថ្មីៗ ផ្សេងពីនោះក៏មានអ្នកស្ម័គ្រចិត្តចំនួន១២នាក់ផ្សេងទៀត៕
