តាមការសន្យាជាមួយអ្នកគាំទ្រ កំលោះមាឌល្អិតសម្បុរស្រអែម ហ្សេដេស ទម្លាក់បទថ្មីក្ដៅៗកាលពីយប់ថ្ងៃទី ១០ មេសាម្សិលមិញនេះ នៅលើ Yotube និង ទំព័រហ្វេសប៊ុកផ្លូវការរបស់ខ្លួន ដែលមានចំណងជើងថា “ក្រឡុក”។

មនុស្សមិនតិចនាក់ទេ ជាពិសេសអ្នកនិយមលេងបណ្ដាញសង្គម Tik Tok ប្រាកដណាស់បានធ្លាប់ស្ដាប់ឮចម្រៀង “ក្រឡុកទីក្រុង” ដែលមានអ្នកយកទៅលេងរាប់ពាន់នាក់។ ដោយសារតែបទភ្លេង និងបារ៉ូ ពីរោះល្បីខ្លាំងពេក មានអ្នកគាំទ្រច្រើនណាស់បានទន្ទឹងចាំស្ដាប់បទចម្រៀងនេះពេញមួយបទ។ មិនធ្វើឱ្យអ្នកគាំទ្រខកចិត្ត ហេ្សដេស ទម្លាក់ជូនជាកាដូឱកាសបុណ្យចូលឆ្នាំខ្មែរ ដាក់មួយបទពេញផ្អើលអ្នកគាំទ្រទាំងយប់។

“ក្រឡុកទីក្រុង” ស្នាដៃថ្មីរបស់ ហ្សេដេស ធ្វើឱ្យអ្នកគាំទ្រពេញចិត្តខ្លាំង និងលាន់មាត់គ្រប់គ្នាថា បន្ទាប់ពីស្ដាប់បទនេះហើយ គឺហឹរខ្លាំង ទាំងបទភ្លេង ជាពិសេសនោះគឺបារ៉ូលតែម្ដង មុតស្រួច ចុកៗ នេះបានសក្ដិសមជាបេក្ខភាពចំណាត់ថ្នាក់កំពូលរបស់កម្មវិធី The Rapper Cambodia។

រំឮកផងដែរថា ហ្សេដេស គឺជាបេក្ខភាពដ៏លេចធ្លោមួយរូបនៅក្នុងកម្មវិធីប្រកួត The Rapper Cambodia ចាប់តាំងពីវគ្គដំបូង រហូតវគ្គផ្ដាច់ព្រ័ត ដែលទទួលបាន Top3។ យ៉ាងណាបើទោះជាមិនបានពាន តែ ហ្សេដេស បានពានច្រើនណាស់ពីមហាជន ការស្រឡាញ់ចូលចិត្ត ជាពិសេសគឺមហាជនទទួលសមត្ថភាពរបស់ ហ្សេដេស ថាពិតជាខ្លាំង៕ ចង់ដឹងថាស្នាដៃថ្មីរបស់ ហ្សេដេស ពិសេសកម្រិតណា ទស្សនាខាងក្រោម៖