ធ្លាប់ដឹងអត់? តួស្រីក្នុងរឿងហូលីវូដល្បីៗ ៥រូប មានឈាមជ័រជាខ្មែរ

2020-06-16 02:56:19
ព័ត៌មាន

2020-06-16 02:56:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តខ្លះ ប្រហែលជាធ្លាប់ទស្សនារឿងហូលីវូដល្បីៗ ដូចជារឿង "Skyfall", រឿង "The Girl with the Dragon Tattoo", រឿង "Gods of Egypt ឬរឿង “G.I. Joe: Retaliation” រួចមកហើយ ប៉ុន្តែប្រិយមិត្តប្រហែលមិនទាន់បានដឹងទេ ថាក្នុងខ្សែភាពយន្តទាំងនោះ មានតួសម្ដែង ដែលមានឈាមជ័រជាខ្មែរ។ ទោះពួកគេកើតនៅបរទេស ប៉ុន្តែពួកគេមានឪពុក ឬម្ដាយជា ជាជនជាតិខ្មែរ ដែលចាកចេញពីកម្ពុជា អំឡុងសម័យសង្រ្គាម។

តើពួកគេមានប្រវត្តិយ៉ាងណា និងសម្ដែងបានរឿងអីខ្លះ?

១. Bérénice Marlohe

Bérénice Marlohe

Bérénice Marlohe បានធ្វើឲ្យប្រជាជនខ្មែរមួយចំនួនភ្ញាក់ផ្អើល ក្រោយចេញរឿង Skyfall ដ៏ល្បី ដែលនាងបានដើរតួជាមួយ Jame Bond។ Bérénice កើតនៅឆ្នាំ១៩៧៩ ក្នុងទីក្រុងប៉ារីស ប្រទេសបារាំង ដែលមានម្ដាយជាជនជាតិបារាំង និងឪពុកជាជនជាតិខ្មែរកាត់ចិន ដែលចេញពីប្រទេសកម្ពុជា ទៅរស់នៅប្រទេសបារាំង។ នាងបង្ហាញវត្តមានដំបូងក្នុងរឿងខ្លីបារាំង La discordance ក្នុងឆ្នាំ២០០៧។ មកទល់ពេលនេះ នាងសម្ដែងបានជាច្រើនរឿង ដែលក្នុងនោះ ៣រឿងចុងក្រោយ រួមមានរឿង Song to Song, Revolt និងរឿង Kill Switch។

Bérénice Marlohe និង Daniel Craig (Jame Bond) ក្នុងរឿង Skyfall

២. Elodie Yung

Elodie Yun

Elodie Yung បានលេចមុខក្នុងរឿង Hollywood ជាច្រើនមកហើយ ដូចជា “The Girl with the Dragon Tattoo”, “ 10 Things I Hate About Life”, “G.I. Joe: Retaliation”, "Narcopolis", "Gods of Egypt" និងរឿង "The Hitman's Bodyguard" ជាដើម។ Elodie បានកើតនៅទីក្រុងប៉ារីស ប្រទេសបារាំងដែរ ក្នុងឆ្នាំ១៩៨១ ដែលមានម្ដាយជាជនជាតិបារាំង និងឪពុកជាជនជាតិខ្មែរ។ រួមទាំងភាពយន្តបារាំងផង នាងសម្ដែងភាពយន្តបានមិនក្រោម ១០រឿងនោះទេ និងរឿងភាគបញ្ចាំងតាមទូរទស្សន៍ចំនួនយ៉ាងតិច ៨រឿងផងដែរ។

Elodie Yung ក្នុងឈុតមួយនៃរឿង Gods of Egypt

៣. Ellen Wong

Ellen Wong មាន វត្តមានក្នុងរឿង Hollywood ដូចជា “Scott Pilgrim vs. the World”, រឿងកាណាដា “Silent Night”, រឿង "The Void", រឿង "The Circle" និងរឿង "In the Life of Music" ជាដើម។ Ellen បានកើតក្នុងឆ្នាំ១៩៨៤ ឬ ១៩៨៥ នៅទីក្រុង Toronto ប្រទេសកាណាដា។ ឪពុកម្ដាយរបស់នាង ជាជនជាតិខ្មែរ ដែលភៀសខ្លួនទៅកាណាដា គេចពីរបបប្រល័យពូជសាស្រ្ដ។ ក្រៅពីសម្ដែងរឿងភាគដុំ នាងក៏សម្ដែងក្នុងរឿងភាគតាមទូរទស្សន៍ផងដែរ។

Ellen Wong

៤. Chanty Sok

Chanty Sok ធ្វើឲ្យអ្នកទស្សនា ស្គាល់តាមរយៈរឿង Hollywood “The Fighter”, “Ted” និង “The Test”។ នាងបានកើតនៅឆ្នាំ១៩៨៤ ក្នុងទីក្រុងញីវយ៉ក សហរដ្ឋអាមេរិក។ យោងតាមគេហទំព័រ playasonly ឲ្យដឹងថា Chanty ជាកូនចៅខ្មែរ។

៥. Marline Yan

Marline Yan បានបង្ហាញមុខក្នុងរឿងកាណាដា “Trigger” ក្រៅពីនេះ នាងសម្ដែងក្នុងភាពយន្តភាគបាន៤រឿងទៀតដែរ។ Marline បានកើតនៅឆ្នាំ១៩៩៣ ក្នុងខេត្ត Ontario ប្រទេសកាណាដា ជាកូនកាត់ច្រើនសាសន៍ រាប់ទាំងវៀតណាម ចិន ថៃ ឥណ្ឌា និងខ្មែរ។ នាងអាចនិយាយភាសាខ្មែរបានយ៉ាងច្បាស់ទៀតផង។