- 2021-07-26 04:09:44
- ព័ត៌មាន
ទីបំផុតថ្នាក់ដឹកនាំ Galaxy Navatra ឆ្លើយមួយម៉ាត់ច្បាស់ៗ ជុំវិញរឿងបញ្ជាទិញ Robot ពីអាឡឺម៉ង់
- 2021-07-26 04:09:44
- ចំនួនមតិ 0 | ចំនួនចែករំលែក 0
ទីបំផុតថ្នាក់ដឹកនាំ Galaxy Navatra ឆ្លើយមួយម៉ាត់ច្បាស់ៗ ជុំវិញរឿងបញ្ជាទិញ Robot ពីអាឡឺម៉ង់
ចន្លោះមិនឃើញ
ផលិតកម្ម Galaxy Navatra សប្ដាហ៍មុន បានធ្វើឲ្យក្រុមអ្នកគាំទ្របើកភ្នែកធំៗ ក្រោយលេចដំណឹងផលិតកម្មនេះបានបញ្ជាទិញគ្រឿងយន្តស្វ័យប្រវត្តិ ឬ Robot មួយគ្រឿងដែលមានតម្លៃកប់ក្ដោងពីប្រទេសអាឡឺម៉ង់ ហើយនៅថ្ងៃនេះ ថ្នាក់ដឹកនាំផលិតកម្មបានឆ្លើយតបរឿងនេះហើយ។
លោក យឹម តាស្រង់ កាលពីសប្ដាហ៍មុនបានបដិសេធន៍ក្នុងការអធិប្បាយក្រោយពីបានបែករឿងខាងលើ ធ្វើឲ្យមានការភ្ញាក់ផ្អើលខ្លាំងនៅក្នុងសង្គមសិល្បៈនោះ បានឆ្លើយតបតាមរយៈសារអេឡិចត្រូនិកនៅថ្ងៃនេះ។ លោកបានឲ្យដឹងថា អង្គភាពរបស់លោកពិតជាបានទិញគ្រឿងយន្តនោះដូចការបែកធ្លាយមែន។
"អឹម...ហ្នឹងហើយ ទិញ ទិញមែន...!”។ យឹម តាស្រង់ ឆ្លើយតបយ៉ាងខ្លី នៅក្នុងការព្យាយាមស្វែករកការបញ្ជាក់ជាថ្មីពីក្រុមការងារ Sabay លើរឿងដែលបែកខ្ចរខ្ចាយកាលពីសប្ដាហ៍មុន។
ទោះយ៉ាងណា លោកមិនបានអធិប្បាយលម្អិតលើរឿងនេះទេ ក្នុងនោះថាតើ គ្រឿងយន្តដែលទិញនោះ ជាប្រភេទយ៉ាងម៉េច ក៏លោកបានបញ្ជាក់ដែរ។ ប៉ុន្តែបើតាមប្រភពមួយដែលទម្លាយចេញកាលពីសប្ដាហ៍មុន គឺជាប្រភេទដៃយន្តដែលគេឃើញប្រើភាគច្រើនក្នុងឧស្សាហកម្មភាពយន្តរីកចម្រើនដូចជាហូលីវូដជាដើម។
ដៃយន្តប្រភេទនេះ វាអំណោយផលច្រើនលើការងារថតចម្រៀង ឬភាពយន្ត ដែលមានលក្ខខណ្ឌបត់បែនបានគ្រប់ស្ថានភាព ដែលលក្ខខណ្ឌខ្លះមនុស្ស ពិតមិនអាចធ្វើបាន ពោលគឺវាមានភាពបត់បែនជាង លឿនជាង និងប្រសិទ្ធភាពជាង។
ត្បិតថា ថ្នាក់ដឹកនាំរបស់ Galaxy បង្ហើបតែមិនបង្ហើយ តែផ្អែកលើការបង្ហើបរបស់ប្រភពដដែលកាលពីសប្ដាហ៍មុន គេមើលឃើញថា ដៃយន្ត គឺពិតជាសមស្របសម្រាប់ការងារក្នុងផលិតកម្ម ដូចគេបានរៀបរាប់ពីខាងលើ។ ប្រសិនបើអ្វីៗជាការពិត ១០០% Galaxy Navatra គឺជាផលិតកម្មក្នុងស្រុកទី១ ដែលបានដាក់បញ្ចូលគ្រឿងយន្តស្វ័យប្រវត្តិកម្មនៅក្នុងសង្វាក់ផលិតកម្មរបស់ខ្លួន ខណៈតាមតម្រុយ គ្រឿងស្វ័យប្រវត្តិកម្មមួយនេះ មានតម្លៃដល់ទៅជាង ២០ម៉ឺនដុល្លារអាមេរិកឯណោះ៕