ឪពុកមារបស់កុមារីល្អហួស លោក គឹម សាន បានប្រកាសជ្រើសរើសតួសម្ដែងប្រុសចំនួន២នាក់ គឺតួនេនទុំ និងពេជ្រ។ “ទុំទាវ” ឆ្នាំ២០២២ បានក្លាយជារឿងអក្សរសិល្ប៍បែបទំនើបដែលលោក គឹម សាន អះអាងថា រឿងនេះលោកធ្លាប់ថតជិតចប់ហើយ ប៉ុន្ដែដោយជួបបញ្ហាបច្ចេកទេសក៏ត្រូវថតភាគបញ្ចប់ឡើងវិញ។

លោក គឹម សាន បានបង្ហាញរូបថតល្អហួស១សន្លឹកនៅលើបណ្ដាញសង្គមកាលពីល្ងាចមិញ ដើម្បីភ្ជាប់ជាមួយសេចក្ដីប្រកាសជ្រើសរើសតួប្រុសដែលទំនងកុមារីល្អហួស នឹងត្រូវសម្ដែងជាតួអង្គទាវ។ លោកបញ្ជាក់ថា លើកមុនថតជិតចប់ម្ដងហើយ ប៉ុន្ដែឆេះដុំផ្ទុករូបភាព និងវីដេអូ ព្រមទាំងបញ្ហាបន្តិចបន្តួច ដូចច្នេះហើយទើបលោកសម្រេចចិត្ដថតសារថ្មីទាំងស្រុង។

លោក គឹម សាន៖ “ឈុតទុំរត់មករកទាវដែលម៉ែបង្ខំឲ្យរៀបការ រហូតដល់ក្ស័យសង្ខារវាងគូរស្នេហ៍ទាំងពីរនៅក្រោមដើមពោធិ៍៏”។

លោក គឹម សាន បានបង្ហាញលក្ខណ្ឌតួអង្គទុំ និងពេជ្រ ដែលអាចនឹងត្រូវជ្រើសរើសឲ្យសម្ដែង គឺត្រូវមានមុខមាត់ខ្មែរ១០០% សម្បុរស្រអែម មានអាយុចន្លោះពី១៨ឆ្នាំ ទៅ២៦ឆ្នាំ ហើយមានដុង ឬទេពកោសល្យខាងសម្ដែងស្រាប់៕