លោក រតនៈ វិបុល គឺជាអ្នកដឹកនាំសម្ដែងក្រុមកំប្លែងវ័យក្មេង ហើយលេចធ្លោរក្នុងវិស័យភាពយន្ដ ជាពិសេសទទួលបានការគាំទ្រច្រើនពីកុមារ និងក្មេងជំទង់។ លោកមានទម្លាប់មួយក្នុងការផលិតរឿង ដែលអ្នកនិពន្ធ ឬអ្នកដឹកនាំនៅកម្ពុជាមិនអាចធ្វើបានដូចលោក។

ក្នុងឱកាសចូលរួមក្នុងកម្មវិធីមួយនៅសណ្ឋាគារ សូហ្វីតែលភ្នំពេញ កាលពីថ្ងៃទី៣០ ខែឧសភា រតនៈ វិបុល ប្រាប់Sabay ថា បច្ចុប្បន្នក្រុមលោកទទួលបានការងារកាន់តែច្រើនលើការផលិតរឿងបែបកំប្លែង និងអប់រំ ដោយមានការឧបត្ថម្ភពីក្រុមហ៊ុននានា។ លោកថា ម្ចាស់ ឬតំណាងក្រុមហ៊ុន បានបណ្ដាក់គ្នាចូលជួបលោកដើម្បីនិយាយរឿងការងារថតដោយមានភ្ជាប់ផលិតផលរបស់ពួកគេ ប៉ុន្ដែពេលខ្លះលោកក៏មិនអាចទទួលយកការងារទាំងអស់ពីគ្រប់គ្នាបានដែរ។

រតនៈ វិបុល៖ “វាពិបាក...ដោយសារក្រុមហ៊ុនខ្លះតម្រូវឲ្យយើងសរសេរscript ឬយកអាសាច់រឿងដែលត្រូវថតហ្នឹងឲ្យគេមើលមុន ដល់អីចឹងយើងធ្វើអត់ទាន់ទេ។ ទម្លាប់ខ្ញុំអត់ដែលសរសេរអីទេ គឺដឹកនាំសម្ដែងយកហ្មង ហើយចេញទៅ១០០(រឿង) សឹងតែមិនខុសមួយទេ"។

លោក រតនៈ វិបុល ដែលភាគច្រើនគេស្គាល់តែឈ្មោះ តែមិនស្គាល់មុខលោកឡើយ។ នៅថ្ងៃអនាគតលោកក៏មានគម្រោងចេញមុខក្នុងខ្សែភាពយន្ដដែរ ហើយក្នុងរយៈពេល២ ទៅ៣ឆ្នាំទៀត លោកនឹងផលិតខ្សែភាពយន្ដភាគវែងៗ ដើម្បីបម្រើអារម្មណ៍ទស្សនិកជនគ្រប់វ័យ។

ផលិតកររូបនេះ បានចាប់អាជីពផលិតខ្សែភាពយន្ដបែបកំប្លែង និងអប់រំគ្រប់រស់ជាតិតាំងពីឆ្នាំ២០១៦ ដើម្បីឆ្លុះបញ្ចាំងពីសង្គមពិតផង និងជួយផ្សព្វផ្សាយផលិតផ្សេងៗផង ដើម្បីជាប្រភពចំណូលដល់ដំណើរការផលិតរឿងរបស់ខ្លួន។ តួអង្គសំខាន់ ហើយល្បីនៅក្នុងរឿងរបស់លោក គឺមានដូចជា៖ ហ៊ាតុង និងមីង ដុល្លារ ជាដើម៕