លោក ឆាយ បូរ៉ា ប្រធានសមាគមភាពយន្តខ្មែរ ទទូចសុំឲ្យមានការ​អនុគ្រោះ​ពន្ធ​ដល់​ផលិតករ​ខ្មែរ​ ដើម្បី​ឲ្យ​វិស័យ​​ភាពយន្ត​កាន់​តែ​មាន​ល្អ​ប្រសើរ។ សំណើនេះលោក ឆាយ បូរ៉ា ស្នើសុំម្តងទៀត ស្របពេលដែល​សម្តេច ហ៊ុន សែន នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា ប្រកាស​លើក​លែង​ពន្ធ​បន្ថែមលើការនាំចូលភាពយន្តបរទេស មកចាក់ផ្សាយតាមស្ថានីយទូរទស្សន៍ថ្មីៗនេះ។

ដូច​សព្វ​មួយដង​ប្រធាន​សមាគម​ភាព​យន្ត​កម្ពុជា​ លោក ឆាយ បូរ៉ា ​នៅ​តែ​បន្ត​ស្នើសុំឲ្យសម្ដេច ហ៊ុន​ សែន ​​ប្រមុខ​រាជរដ្ឋាភិបាល ក៏​ដូច​ជាក្រសួង​ពាក់ព័ន្ធ​​​ឲ្យ​ជួយ​អនុ​គ្រោះ​ទៅ​លើ​ការ​បង់​ពន្ធ​​​​​ក្នុង​វិស័យ​ភាព​យន្ត​ខ្មែរ​ ដោយ​​លើក​លែង​ពន្ធ​​​ពី​១០ ទៅ​១៥ ​ឆ្នាំ​ចាំ​បង់​ពន្ធ​ ធ្វើយ៉ាងណារង់​ចាំ​ឲ្យ​​​វិស័យ​​នេះ​ដើរ​ទៅ​​មុខ​​​បាន​ល្អ​ជា​ងនេះ​​បន្តិច​សិន​​។

លោក​បាន​ប្រាប់ថា លោក​ក៏​ចង់​ឲ្យ​សម្ដេច​​ជួយ​អនុគ្រោះ​ចំពោះ​ពន្ធ​ផលិតករ​ក្នុង​ស្រុក​ផង​ដែរ​។ ទន្ទឹម​នឹង​ការ​​ត្រេក​អរ​ចំពោះ​ការ​រក្សា​​ម៉ោង​មាស​ចាក់​ផ្សាយ​ភាពយន្ត​ខ្មែរ លោក​ក៏​បារម្ភ​ថាខ្សែភាពយន្ត​បរទេស​នឹង​វាយ​​លុក​​ទីផ្សារខ្មែរ​កាន់​តែ​ខ្លាំង ដែល​ធ្វើ​ឲ្យ​ភាព​យន្ត​ខ្មែរ​កាន់​តែ​ពិបាក​ក្នុង​ការ​ប្រកួត​ប្រជែង​ផ្នត់​គំនិតទស្សនិកជន​ខ្មែរ​ដែល​តែង​សរសើរ​ភាព​យន្តបរទេស​ស្រាប់​។

«ពលរដ្ឋ​យើង​គាត់​តែងតែ​ថា ភាព​យន្ត​ខ្មែរ​មិនសូវ​ល្អ​មើល ​ចាញ់​បរទេស​ ខ្ញុំ​ចង់​ឲ្យ​សម្ដេចលោក​ជួយ​ចំ​ពោះ​បញ្ហា​ពន្ធ​ផង ព្រោះ​ពេល​​ពន្ធ​ត្រូវ​បាន​កាត់​បន្ថយ​ នោះ​ផលិតករ​​នឹងទទួល​បាន​ចំណេញ​សមរម្យ​​ ដែល​អាច​ពង្រឹង​កាន់​តែ​ខ្លាំង​លើ​ការ​ផលិត»។ ​​​​​​​ប្រធានសមាគមភាពយន្តខ្មែរ រៀបរាប់។

ក្នុង​ជំនួប​នាយក​រដ្ឋមន្រ្តី និងអ្នកសារពត៌មានលើកទី២នេះ សមាគមន៍​ទូរទស្សន៍ជាតិកម្ពុជា បានស្នើសុំការលើកលែងពន្ធបន្ថែមនេះ រហូតដល់៥ឆ្នាំ ដោយមើលឃើញថា ការដែលបន្ថែមពន្ធលើភាពយន្តភាគបរទេសរហូតដល់ ៤០ម៉ឺនរៀលក្នុង១ភាគទៀត បង្កើនហានិភ័យ ត្បិតចំណូលពីការផ្សព្វផ្សាយនៅមានកម្រិត ហើយភាពយន្តខ្មែរសម្រាប់ចាក់ផ្សាយ ក៏នៅមានកម្រិតដូចគ្នា។

ការពន្យារពេលបន្ថែមពន្ធនេះ ក៏ជួយធ្វើឱ្យស្ថានីយមានឱកាសគ្រប់គ្រាន់ដើម្បីពង្រឹងសេដ្ឋកិច្ចរបស់ខ្លួន និងជួយដល់ការបង្កើតវណ្ណកម្មភាពយន្តបន្ថែមទៀត ក្នុងន័យផលិតភាពយន្តភាគដែលមានគុណភាព សម្រាប់ចាក់ផ្សាយលើកញ្ចក់ទូរទស្សន៍។ តែទោះជាយ៉ាងណា សម្តេចនាយករដ្ឋមន្រ្តី ក៏បានរម្លឹកឡើងវិញថា ស្ថានីយទូរទស្សន៍ទាំងអស់ត្រូវគោរពតាមការរៀបចំចាក់ផ្សាយ ដោយលៃយ៉ាងណាឱ្យភាពយន្តខ្មែរបានចាក់ផ្សាយក្នុងម៉ោងពិសេស និងជៀសវាងការផ្សព្វផ្សាយគ្រឿងស្រវឹងក្នុងម៉ោងដែលបានហាមប្រាម។

បន្ទាប់ពីផ្តល់អនុសាសន៍ដើម្បីផ្សព្វផ្សាយព័ត៌មានឱ្យទទួលបានប្រសិទ្ធភាព សម្តេចនាយករដ្ឋមន្រ្តី ក៏លើកឡើងពីការផ្សព្វផ្សាយព័ត៌មានអំពីតារា ដែលមានអ្នកធំៗជាច្រើនតាមស្នេហ៍ ឱ្យបញ្ចេញឈ្មោះអ្នកធំៗ ឬឧកញ៉ាទាំងនោះឱ្យច្បាស់តែម្តង ដើម្បីកុំឱ្យមានការភាន់ច្រឡំ សង្ស័យលើបុគ្គលត្រឹមត្រូវ ពិសេសធ្វើឱ្យប៉ះពាល់កិត្តិយសរបស់មន្រ្តី អ្នកមុខអ្នកងារ ដែលមានគុណសម្បត្តិជូនរដ្ឋ ហើយសម្តេចក៏ស្នើឱ្យស្ថាប័នព័ត៌មាន ឈប់ផ្សព្វផ្សាយព័ត៌មានបែបចោទប្រកាន់បែបនេះ ព្រោះវាជារឿងបុគ្គល និងមិនច្បាស់លាស់ ខ្វះក្រមសីលធម៌៕