កាលពីដើមឆ្នាំ ២០២១ ផលិតកម្ម JYP បាន​ប្រកាសថា​ សមាជិក GOT7 ទាំងអស់សម្រេច​មិនបន្តកុងត្រាជាមួយនឹង​ផលិតទៀតទេ។

នៅពេល​ GOT7 ត្រៀម​ចេញ​ពី JYP លោក Park Jin Young (CEO របស់ JYP) ក៏បាន​ចុច Unfollow គណនីបណ្ដាញសង្គម​របស់សមាជិក GOT7 មួយ​ចំនួន។ ចំណែក BamBam (GOT7) មិនឲ្យចាញ់ទេ ព្រោះក៏​បាន​ចុច Unfollow លោក Park Jin Young ដែរ ព្រម​ទាំងលុបរូប​មួយសន្លឹកដែល​ថត​ជាមួយអតីតមេទៀត។ អ្នកគាំទ្រដឹង​ដូច្នេះ ក៏មាន​ការ​ភ្ញាក់​ផ្អើល​គួរ​សម​ដែរពេល​នោះ។

ស្ថិតក្នុង​បទ​សម្ភាស​មួយ​ជាមួយ​នឹង​ទស្សនាវដ្ដី Vogue Korea សមាជិក GOT7 រូបនេះ​ក៏​បាន​និយាយពី​រឿង​នេះ​ដែរ។

ដំបូងលោក​ផ្ដើម​ថា​៖ «យើង​ (GOT7) បាន​ពិភាក្សា​គ្នា​ជាង ១ឆ្នាំឯណោះ ហើយ​ដំបូង យើងទាំងអស់គ្នាមាន​អារម្មណ៍រាង​យល់ច្របូកច្របល់បន្តិចដែរ មិនដឹង​ថា​គួរ​ទៅណាទេ។ វាជា​លើកដំបូង​ដែល​ពួកគេ​ត្រូវ​ចាកចេញ​បែប​នេះ។ យើង​ក៏​បាន​សម្រេចថា​ធ្វើ​យ៉ាង​ណា​ ប្រឹង​ប្រែង​សម្រាប់ GOT7 និង JYP ផង។ យ៉ាងណា​ក៏ដោយ ថ្មីៗ​ខ្ញុំ​បាន​ទៅ​ញ៉ាំអីនៅ​ក្រៅ​ជាមួយ​នឹង​ លោក JYP ដែរ»។

ពួកគេ​បាន​​ជជែកគ្នាលេង​ច្រើន ដោយ BamBam បាន​បង្ហើប​ថា៖ «PD-nim បានប៉ាវខ្ញុំ​ញ៉ាំ BBQ ហើយគាត់​និយាយថា “អ្នក​នៅ​តែ​ជាគ្រួសារ​របស់ JYP ចាំសហការគ្នា​នៅ​ថ្ងៃ​ណាមួយទៀតនៅពេល​ក្រោយ” មាន​អារម្មណ៍ថា​កាន់តែ​មាន​កម្លាំង​ចិត្ត។ វា​ប្រៀបដូចជា​ខ្ញុំ​បាន​បញ្ចប់ការសិក្សាពី JYP ហើយចាប់ផ្ដើម​ដំណើរផ្សងព្រេងទៅកាន់​ពិភពថ្មី​មួយទៀត។ ឥឡូវ​នេះ​ខ្ញុំ​នៅជាមួយ​នឹង​ផលិតកម្មថ្មី​ហើយ ខ្ញុំ​ក៏មាន​មិត្តថ្មី​ច្រើន ប៉ុន្តែ​ខ្ញុំ​ក៏នឹង​មិន​អាច​បំភ្លេចដើមកំណើតខ្ញុំ​នៅ JYP ដែរ»។

ដល់ពេល​សួរ​ដល់ថា​ហេតុអ្វី​ត្រូវ​លុបរូប និង​កាត់ផ្ដាច់ទំនាក់ទំនង​លើ​បណ្ដាញ​សង្គមពី JYP លោក​បាន​បកស្រាយ​ថា៖ «PD-nim (JYP) បាន​ចុច Unfollow ខ្ញុំ​មុនដោយចៃដន្យ។ ខ្ញុំ​បាន​សួរ​គាត់​ពី​បញ្ហា​ហ្នឹង​ដែរ ពេល​ញ៉ាំ BBQ ហើយ​គាត់​ថា គាត់ទាល់គំនិត​ដែរពេល​នោះ។ គាត់មិនសូវ​ថ្នឹក​ជាមួយ​នឹងInstagram ទេ ហើយខ្ញុំ​ក៏បាន​លុបរូបភាព​ជាមួយកាត់ចោលដែរទៅ ព្រោះ​មាន​អារម្មណ៍ថាអន់ចិត្តបន្តិចដែរ ហើយខ្ញុំក៏ប្រាប់​គាត់អ៊ីចឹង​ដែរ។ គាត់សើចខ្លាំង​ណា​ពេល​ឮហើយ អ៊ីចឹង​ខ្ញុំ​ក៏ចង់​ឲ្យគ្រប់គ្នា​ដឹង​ដែរ​ពេល​នេះ ថា​គ្មានបញ្ហា​អីធំដុំទេ។ ខ្ញុំ​ក៏តែង​តែត្រូវបានស្វាគមន៍ជានិច្ច រាល់ពេល​ទៅញ៉ាំអីនៅ​ភោជនីយដ្ឋាននៅ JYP ហើយខ្ញុំមាន​សិទ្ធិចេញចូលគ្រប់ពេល»៕